Eurasian Resources Group (ERG) пен Ресейдің «Завод металлоконструкций» акционерлік қоғамы (ЗМК) Қашар карьеріне арналған думпкар жеткізу туралы меморандумға қол қойды.
Келісім Қазақстан мен Ресей аймақтарының XXI форумы аясында Орал қаласында өткен келісімшарттар биржасында жасалды.
Меморандумның жалпы сомасы 15 миллион АҚШ доллары. Құжатқа ERG Коммерция орталығы сатып алулар департаментінің директоры Ойрат Тасқарин мен ЗМК бас директорының бизнесті дамыту жөніндегі орынбасары Андрей Балашов қол қойды.
ERG мен ЗМК арасындағы B2B форматындағы жеке келіссөздер барысында тараптар өзара серіктестікті нығайтуға және іскерлік байланысты одан әрі дамытуға мүдделі екенін білдірді. Кездесу қорытындысы бойынша 2026 жылдың алғашқы жартысында ERG-дің «Темір» дивизионына 87 думпкар жеткізу туралы шешім қабылданды. Жаңа теміржол көліктері Қашар карьерінде қолданылады.
ERG Коммерция орталығының бас директоры Руслан Мулюкбаевтың айтуынша, бұл келісім екі компания арасындағы сенімді серіктестіктің нәтижесі.
Бұл техника өндірісте өзінің қауқарлылығын дәлелдеді. Жаңа форматтағы тікелей серіктестік жұмыстың тиімділігін арттырады. Жаңа думпкарлар паркі Қашар карьеріндегі фабрика кешеніне темір кенін жеткізу тиімділігін арттырып, ERG-дің өндіріс көлемі мен дайын өнім сатылымын ұлғайтуға бағытталған стратегиялық мақсаттарына қол жеткізуге ықпал етеді, — дейді ол.
Форум аясындағы келісімшарттар биржасын ұйымдастыруға «Корпорация МСП» АҚ, Ресей экспорт орталығы (РЭЦ) және QazTrade сауда саясатын дамыту орталығы» АҚ атсалысты.
Іс-шараның басты мақсаты – Қазақстан мен Ресей компаниялары арасындағы тікелей іскерлік байланысты дамыту, жаңа серіктестер табу, өндірісті жергілікті деңгейде ашу және экспорт пен импорттың жаңа мүмкіндіктерін кеңейту.